Nanindugan si Private Prosecutor Amando Ligutan nga wala siya sang ginlapas matapos nga nag-post siya sa Facebook tuhoy sa patakaran nga indi dapat ginatugutan ang misleading questions bisan sa cross-examination sa impeachment trial.
Sa iya counter manifestation sa ika-19 nga adlaw sang impeachment trial ni VP Sara Duterte, ginsiling ni Ligutan nga ginhimo niya ang post sang Agosto 12 antes nag-adjourn ang trial apang nakibot ini nga nangin kontrobersyal gilayon ang amo nga post nga nagbaton sang reaksiyon sa social media, partikular sa legal community.
Ginsiling niya nga indi personal ang iya nga post kag wala man siya sang gintumod nga pangalan ukon gintalakay nga merito sang kaso.
Pahayag niya, bilang isa ka manunudlo, katungdanan niya nga korehiran kun ano man ang sala, kag wala ini sang ginapili nga panahon kag lugar.
Suno sa iya, nabalaka siya nga ang statement nga ginahimo sa open court nga ang misleading questions ang ginatugutan ang indi makorehiran.
Dugang niya, ang pagkorehir sa sala ang indi malain kag bisan ang pagkorehir sang sala ang wala man ginadumilian mangin sa impeachment court.
Ang mas ginkabalak-an pa gid niya kag ginkadismaya amo nga wala gin-ako sang Defense ang ila sala, kag, sa baylo, ginsaway pa nila ang isa ka abogado kag manunudlo nga naghambal lang sang insakto sa iya kaugalingon nga Facebook account.
Sabat naman niya sa panawagan sang depensa nga dapat kuntani nangin “humble” ini kag wala nag-post tuhoy diri, ginsiling niya nga nahibaluan niya ang kahulugan sang humility apang indi ang Defense team ang dapat magtudlo sini bangud sila mismo sa Depensa ang kinahanglan pahanumduman tuhoy sa pagkamapainubuson bangud sa indi nila pag-ako sang ila sala nga pahayag sa korte.
