Nakilala sang publiko si Atty. Rex Fernandez bilang abogado nga nagpatigayon sang hunger strike halin sang Agusto 13, 2021 sa Barangay Subangdaku, Mandaue City, apang magluwas diri, isa man siya ka human rights lawyer kag founding member sang National Union of People’s Lawyers (NUPL).
Subong lang nga hapon, Agusto 26, napuhag ang mga tawo sa R. Duterte Street, Barangay Guadalupe sa Cebu City matapos ginluthang-patay sang motorcycle-riding assailants ang 64-anyos nga si Fernandez.
Dead on the spot ang nasambit nga abogado bangud sang multiple gunshot wounds samtang gindala naman sa ospital ang driver sang iya nga salakyan.
As of press time, padayon ang imbestigasyon sang mga pulis.
Sunod man nga nagpa-gwa sang statement ang NUPL agud ipabutyag ang kasubo bangud ginapahayag founding member sang NUPL si Fernandez sang 2007 kag isa man ka Karapatan counsel sa sulod sang pila na ka tuig.
‘MADAMO SANG CONTROVERSIAL CASES NGA GINAUYATAN’
Isa sa mga anggulo nga ginalantaw sang NUPL sa pagpatay kay Fernandez amo ang iya kontrobersyal nga mga kaso nga ginauyatan bilang human rights lawyer.
Sa interview sang Bombo Radyo kay Atty. Jobert Pahilga, founding member man sang NUPL, iya ginpahayag nga sa kadugay na niya nga pagkakilala sa amo nga abogado, ‘brave kag vocal’ ini nga klase sang tawo.
“Definitely, he was killed because of his being a lawyer and in performance of his function as a lawyer,” pahayag ni Pahilga.
Si Fernandez ang nakabulig sa Cebu campaign agud nga ma-abolish ang pork barrel system sang 2014.
Nagserbe siya bilang co-counsel sang walo ka Cebu activists nga na-aresto sa protesta batok sa anti-terror law sang 2020.
Suno kay Pahilga, ‘for a while’, ‘leaning’ si Fernandez sa Duterte Administration kag gindepensahan pa ang pila ka polisa sang administrasyon apang sang damlag lang, ‘he was disillusioned of what is happening because of ginpangako nga wala man gihapon nagakatabo.’
Sa impormasyon ni Pahilga, wala man sang nangin kaangtanan si Fernandez sa NTF-ELCAC ukon National Task Force to End Local Communist Armed Conflict, ang anti-insurgency task force nga gintukod sang gobyerno nga kontrobersyal bangud sang ginapahayag red-tagging sa activists kag personalities nga kritikal sa Duterte administration.
Pakigbahin pa ni Pahilga, antes ang hunger-strike ni Fernandez, wala man ini sang reklamo nga may pamahog sa iya kabuhi.
Si Fernandez ang ikatatlo nga abogado nga ginpatay sa Cebu sa sulod lang sang isa ka tuig. November 2020 kag December 2020 sang natabo man ang duha ka iban pa nga krimen.
‘TOO EARLY TO TELL’
Suno sa Commission on Human Rights (CHR) Central Visayas, tuman pa ka temprano agud matumod ang motibo sa krimen.
May several sensational cases nga ginauyatan si Fernandez suno sa CHR apang magapatigayon pa sang imbestigasyon kaangot sa pagpatay sa iya. ##
