Ginklaro sang Senate Impeachment court nga importante nga mangin basehan sang desisyon sang mga senator-judges ang mga dokumento, ebidensya, kag testimonya nga pormal nga ginapresenta sa ila sa korte may kaangtanan sa nagapadayun nga impeachment trial batok kay Vice President Sara Duterte.
Ini ang nangin panindugan ni Senate impeachment court spokesperson Reginald Tongol, kasunod sang ginpatigayon nga press conference ni former senator Antonio “Sonny” Trillanes IV kahapon nga adlaw, matapos ini nga nag-withdraw bilang testigo sang prosekusyon.
Sa nasambit nga presscon, ginbuyagyag sang anay senador ang pila sini ka alegasyon batok sa bise presidente kag sa pamilya sini.
Lakip diri ang ginaalegar nga P96-million withdrawal sa joint account ni VP Sara kag ni former President Rodrigo Duterte sa sulod sang isa ka adlaw, ginaalegar nga pagbatun sang pamilya Duterte sang P469 million halin sa Chinese government-linked sources, kag ang ginapahayag ginbatun man sang pamilya nga P181.65 million halin sa gintawag ni Trillanes nga drug lord nga negosyante nga si Samuel “Sammy” Uy.
Dugang pa ni Tongol, posible gid sa gihapon nga mahimo sang prosekusyon nga ipresenta si Trillanes bilang testigo kun nagapati ang mga ini nga makabulig ang anay senador sa pagpaayo sang ila nga kaso sa nagapadayun nga impeachment proceedings.
