Masobra isa ka siglo na ang nagligad halin sang natabo ang Titanic tragedy kun sa diin masobra 1,500 ang napatay kag yara lamang sa 700 ang nakaluwas. Sa pihak sini, halos tanan ilabi na ang researchers kag historians ang nagabalik-balik sa sini nga istorya nga daw kaangay nga daw yara gid sila nagakabuhi sang tuig 1912.
Sa Australia, may yara sang isa ka bilyonaryo nga nag-anunsyo nga buhion sini ang iya handum nga makatukod sang replica sang Titanic kag natalana man ini nga maglayag sa kaangay nga ruta sang iconic nga barko sa Hunyo 2027.
Una nga naanunsyo sang 69-anyos nga billionaire nga si Clive Palmer ang iya plano sang 2012 apang wala ini nadayon. Ginlunsar ini liwat sang 2018 kag malayag na kuntani sang 2022 apang na-delay liwat bangud sa COVID-19 pandemic.
Ini nga replica ang magabug-at sang 56,000 tonelada kag may siyam ka mga deck. May kabug-usan man ini nga 835 cabins nga sarang maka-akomodar sang 2,435 ka mga pasahero.
Halos katunga naman sini ang itigana para sa first class passengers. Kaangay sa naglugdang nga barko, lakip man sa layout sini ang ballroom, ang bridge, ang swimming pool, kag ang Turkish baths.
Pahayag pa sang bilyonaryo, i-hire niya ang pinakamaayo nga ship-builders, designers, kag engineers sa bilog nga kalibutan agud nga mahuman ang Titanic ll.
Plano ni Palmer nga masuguran ang construction sa 2025 kag magalayag na sa Hunyo 2027 halin sa Southampton, England padulong sa New York nga amo man ang ruta sang original nga Titanic sang 1912.
Nahibaluan nga ang original nga Titanic ang naglugdang sadtong Abril 1912 matapos nga nakabunggo sa iceberg.
Ini nga trahedya amo ang inspirasyon sa 1997 hit romantic film ni James Cameron kun sa diin bida sanday Leonardo DiCaprio kag Kate Winslet kag nakadaog sang 11 ka Oscars lakip na si Kate nga amo ang Best Actress.
