Lain-lain ang preparasyon sang kada Olympian antes sila magsaka sa ginakabig pinakadaku nga entablado para sa mga atleta sang bilog nga kalibutan.
Sobra ang ila halong antes ang ila nga kumpetisyon, apang may yara gid sang mga sirkumstansya nga indi gid mapaktan kag sarang gid makaapekto sa ila handum sa pagtapak sa Olympiada.
Kaangay sa isa ka 30-anyos nga field hockey player kag two-time Olympian sang Australia nga si Matt Dawson nga wala sang iban nga ginahandum kundi makuha ang gold medal subong nga Paris Summer Games matapos nakadaog sang silver sang nagligad nga Tokyo Olympics.
Duha ka semana antes ang Olympics, samtang yara siya sa practice, natam-an gid ang iya isa ka tudlo bangud naigu ini sang hockey stick.
Sang amo nga tion, halos madula na sa iya ang iya nga Olympic dream bangud nakahibalo siya nga maapektuhan gid ang iya performance bangud sa injury sang iya ring finger.
Mangin ang surgeon ang nagsiling nga “severe impact” gid ang natabo sa iya tudlo kag maayo na lang bangud nagakabit pa ini.
Duha ka options ang ginhatag sa Olympian: una, i-reconstruct ang iya tudlo paagi sa pagbutang sang wire, apang nagakahulugan ini nga dapat apat tubtub anum ka bulan gid ang ipahuway sang iya ring finger agud nga maka-recover — buot silingon, wala na siya sang tyansa nga maka-compete sa Olympics.
Ang ikaduha sini nga option amo nga dalayon na lang nga utdon ang apektado nga tudlo.
Daku ini nga desisyon para sa hockey player, apang ginpili sini nga hungod na lang nga ipa-utod ang apektado nga tudlo agud nga makahampang siya sa Paris kag may tyansa nga makuha ang bulawan nga medalya.
Subong nga Hulyo 27, kaupod si Dawson sa Kookaburras nga maga-atubang sa pungsod Argentina eksakto siyam ka adlaw matapos nga naangkon niya ang injury.
Ginlaragway man sini nga yara siya sa “best position” kag nalangkag gid siya nga makahampang ilabi na bangud may talapuson pa sila nga misyon kasunod sang ila silver medal finish sa Japan sang 2021.
“There was a rollercoaster of emotions in the last two weeks of not really knowing. Going into my third Olympic Games and then initially thinking that that was going to be taken away from me. But then it all came back pretty quickly. And now, I guess I’m in the best position to be here only 48 hours now out from our first game, which is really exciting,” pahayag sini.
“I’m just looking forward to the opportunity of, I think this group is building to something pretty special. We were pretty close in Tokyo. And I think there’s that burning desire and the drive within the group to continue to push ourselves and win that elusive title,” dugang sang Olympian.#
