Nanginwala ang Australian Open organisers nga isa ka sahi sang pagpang-blackmail ang ila nga pag-require sang COVID-19 vaccination nga amo ang ginatudlo rason kun ngaa posible indi makahampang si World Number One kag 20-time grand slam champion Novak Djokovic sa maabot nga Enero.
Una diri, nagpahayag si Srdjan, amay ni Djokovic, nga duha-duha pa kun makapartisipar ang iya anak sa kumpetisyon sa Melbourne Park sa Enero 2022 kag ginpahayag man sini nga katumbas sang blackmail ang pagsulundan sang Tennis Australia sa vaccination sa mga players.
Tubtub subong, wala pa ginasapubliko kun bakunado na ukon indi si Djokovic.
Sabat naman ni Victorian Sports Minister Martin Pakula, ginapasigurado lang nila nga protected ang Victorian community kadungan sang amo kadaku nga kumpetisyon.
Katungdanan sang international tennis players nga magsunod diri nga requirement, apang suno kay Pakula, diretso na ni Djokovic kun mapabakuna ini ukon indi.
Nahibaluan nga nakadaug na si Djokovic sang siyam ka Australian Open men’s singles titles kag amo subong ang defending champion.Pareho sila nanday Roger Federer kag Rafael Nadal nga may 20 men’s major singles titles. ##
