ILOILO CITY- Ginausisa na sang Iloilo City Police Office kon authentic ang naggwa nga video sa social media tuhoy sa cockfighting activity sa Rockwell Cockpit Arena sa Barangay Don Esteban, Lapuz, Iloilo City.
Sa interview sang Bombo Radyo kay Iloilo City Police Office Director PCol Uldarico Garbanzos, iya ginpahayag nga kuhaan man nila sang statement ang nag-upload sang amo nga video.
Una na nga nag-isyu sang show-cause order si Iloilo City Mayor Jerry Treñas batok sa Rockwell Cockpit Arena kasunod sang naglapta nga video sang ginapatigayon nga bulang.
Ginpanindugan naman sang tagdumalahan sang Rockwell nga wala sang may natabo nga bulang sa arena sang Marso 22 kag 23.
Nahibaluan nga suspendido ang pagpatigayon sang bulang tubtob sa Abril 4 santo sa Resolution No. 103 nga gin-isyu sang Inter-Agency Task Force for the Management of Emerging Infectious Diseases (IATF) bangud sa pagtaas sang kaso sang COVID-19 sa pungsod.
