Nagpanindugan ang Police Regional Office (PRO) VI nga wala ginatago sang pulis ang resulta sang autopsy examination sa bangkay ni Karl Dannielle Bolante, 27 anyos nga lalaki nga naluthangan-patay matapos nasal-an nga subject sa drug buy bust operation sa Barangay North Baluarte, Molo, Iloilo City sang nagligad nga Hunyo 29.
Sa interview sang Bombo Radyo kay Pol. Lt. Col. Joem Malong, spokesperson sang PRO VI, iya ginpahayag nga may imbestigasyon nga ginapatigayon kag samtang wala pa natapos ang pagpangusisa, may mga dokumento nga indi pwede masapubliko.
Base ini sa memorandum circular sang National Police Commission (NAPOLCOM) ukon NaPolCom Memorandum Circular 2006-022 kun sa diin nakasaad nga ginadumilian ang pagpagwa sang mga dokumento nga naangot sa internal investigation sang PNP kun wala sang pahanugot halin sa PNP chief, sa police chief, ukon sa iya nga designee.
Sa lebel ni Malong bilang spokesperson sang hanay sang PNP sa Western Visayas, ginpahayag sini nga indi niya mabuyagyag ang resulta bangud una, wala siya sa husto nga posisyon, kag ikaduha, indi man siya ang imbestigador sang amo nga kaso.
Ginahulat subong suno kay Malong ang investigation report agud malikawan na ang pagdugang sa mga istorya angot sa kaso ni Bolante.
Una diri, nagpahayag ang pamilya Bolante nga tubtob subong wala pa nabaton sang pamilya ang kopya sang autopsy examination resulta apisar yara na ini sa Molo Police Station sang nagligad pa nga Hulyo 6.
Matandaan nga nangin kontrobersyal ang kaso ni Bolante bangud ginapahayag sang pamilya nga nasalabat lang ang biktima bangud ang matuod nga subject sang operasyon amo si Dave Mendoza, 23, residente sang Rizal Pala-Pala 2, Iloilo City Proper.
Mismo si PNP Chief Gen. Guillermo Eleazar ang naghingyo nga id-idan ang imbestigasyon agud mahibal-an kun may kapaltahan sa operasyon sang mga pulis. #
