ILOILO CITY–Ginpagwa na sang Police Regional Office (PRO) 6 ang resulta sang autopsy examination sa isa sa mga drug personalities nga ginluthang-patay matapos magbato sa mga otoridad sa San Jose, Antique.
Sa interview sang Bombo Radyo kay Dr. Owen Lebaquin, medico legal officer sang PRO6, iya ginpahayag nga nag-angkon sang isa ka igo sa ulo kag duha naman sa dughan si Jennifer Gobatangga sang Brgy. Ticud, Lapaz, Iloilo City.
Mahimo suno kay Lebaquin nga yara sa likod ang nagtiro kay Jennifer bangud nga ang entrance sang pilas ang yara sa likod nga bahin sang ulo malapit sa dulunggan kag naglapos sa tangkugo.
Ang isa pa gid ka igo ni Jennifer ang mahimo naangkon sang nagahigda ang drug personality rason nga naglapos na lang sa iya nga dughan.
Ginpaidalom man sa autopsy ang bangkay sang pakaisa ni Jennifer nga si Gayrell Gobatangga.
Suno kay Lebaquin, si Garyrell ang nag-angkon sang anom ka igo sang bala apang wala pa natumod kun sa diin ang entrance sang pilas.