Naggwa na ang autopsy result sang 36 anyos nga si Claire Diergos nga nasapwan nga bangkay na sa sulod sang isa ka sports utility vehicle (SUV) sa Barangay Inangayan, Sta. Barbara, Iloilo.
Sa interview sang Bombo Radyo kay Police Major Reymond Celoso, hepe sang Sta. Barbara Municipal Police Station, iya ginpahayag nga posible nga nagahigda ukon nagatindog ang biktima sang natabo ang krimen kag yara sa likod sini ang perpetrator santo sa patal nga mga pilas sa li-og sang babaye.
Suno kay Celoso, isa ka incised wound ukon dako nga hiwa kag duha ka buno sa li-og ang na-angkon sang biktima.
Nakit-an man ang duha ka defense wound kag magagmay nga mga pilas sa wala kag tuo nga kamot sang babaye.
Ginapahayag nga kutsilyo ang gingamit sa krimen.
Santo sa imbestigasyon sang Scene of the Crime Operation (SOCO), wala sang may nakit-an nga dugo sa sulod sang salakyan kun sa diin nasapwan ang bangkay ni Diergos.
Bangud sini, dako ang posibilidad nga ginpahamtang lang ang bangkay sang biktima sa sulod sang iya salakyan matapos ginputos sang habol kag comforter.
Pahayag sang pulis, ginalantaw man ang posibilidad nga ginpatay si Diergos sa sulod sang iya nga balay sa Deca Homes Subdivision sa Pavia, Iloilo.
Sa subong nagapadayon ang imbestigasyon kag pagtsikyar sang SOCO sa balay sang babaye kag gina-usisa man ang bag-o lang gin-hire nga timbang sang biktima.
