πππ£ππ¦, π§ππ₯πππ βNagaguwa sa ginpatuman nga autopsy sang National Bureau of Investigation (NBI) sa lawas sang beauty pageant contestant nga si Geneva Lopez kag sang iya Israeli boyfriend nga si Yitshak Cohen nga sila ang may duha ka igo sang bala.
Suno kay NBI Director Jaime Santiago, nagaguwa sa resulta nga may igo sang bala si Lopez sa iya nga likod kag hita, samtang si Cohen naman ang may gunshots sa iya dughan nga naglapos sa likod kag may igo man sa ilok.
Ginpahayag man ni Santiago nga nakita sa lawas ni Lopez ang slug sang bala nga plano ipaidalum sa ballisti examination.
Nagapabilin naman nga wala pa mapaguwa sang Scene of the Crime Operation (SOCO) ang resulta sang ila ginpatuman nga DNA testing.
Nagpasalig naman si Santiago nga ang Philippine National Police-Criminal Investigation and Detection Group (CIDG) ang magapanguna sa imbestigasyon, samtang ang National Bureau of Investigation (NBI) ang nagakoordinar sa ila agud maghatag sang forensic assistance.
Ginpasigurado naman sang natungdan nga 99% nga ang nakit-an nga mga lawas amo ang na-missing nga mga nasambit nga indibidwal.
Kun balikan, nakit-an kahapon nga adlaw, ang lawas sang mga biktima sa bakante nga lote sa isa ka quarry site sa Brgy. Sta. Lucia, Capas, Tarlac.
Ini ang ginkumpirma man sang himata sang mga biktima nga ang duha ka na-identify nga lawas amo sanday Lopez kag Cohen.
Ulihi nakit-an ang duha ka biktima sang Hunyo 21, sakay sa SUV nga nagpadulong sa Capas, Tarlac agud nga magpangita sang propedad nga ginaplano nila nga baklon.
Natumod naman nga ang SUV nga gingamit ni Lopez kag Cohen ang ulihi nakit-an sa Capas Road nga sunog na.
Ginalantaw naman sa nagluntad nga krimen ang posibilidad nga motibo sa duta ang rason sang kamatayon sang beauty queen kag sang iya nga Israeli nga nobyo.
