Mas nagapag-on ang tyansa sang Alas Pilipinas nga makasulod sa masunod nga round matapos ginhatagan sang mapait nga kalutusan ang India sa nagapadayon nga hampang sa AVC Challenge Cup sa Rizal Memorial Coliseum.
Nakuha na subong sang national team ang lead kag nagaisahanon na lamang nga grupo nga undefeated sa Pool A, 2-0.
Naalangan man sa first set apang nakabawi ang Pilipinas, 22-25, 25-21, 25-17, 25-18.
Padayon sa pag-idlak ang pangalan sang young player kag national team debutant nga si Angel Canino samtang suksok ang Pilipinas jersey. Gin-reset sini ang iya nga national team career-high nga rekord paagi sa 22 puntos nga mas mataas sa iya 17-puntos nga ginpaulan sa ila man four-set win batok sa Australia sang nagligad nga gab-i.
Nakabubo naman si Eya Laure sang 17 puntos; may tag-12 sanday Fifi Sharma kag Thea Gagate; samtang may nuebe puntos naman si Sisi Rondina.
Sunod nga atubangon sang Pilipinas ang Iran (1-1) 7:00 buwas sa gab-i, Mayo 25, kag pagasundan sang hampang batok sa Chinese Taipei (0-3) sa Domingo sang gab-i nga amo ang magamarka sang pagtakop sang group campaign.
Ang duha sa pinakamataas nga teams amo ang magaabanse sa knockout semifinals nga magasugod sa Martes sa masunod nga semana.
