Ginkumpirmar sang Aviation Police nga nag-negatibo sa droga kag alcohol ang driver sang sports utility vehicle (SUV) nga nag-arado sang entrance sang Ninoy Aquino International Airport (NAIA) Terminal 1 nga nagtuga sang kamatayon sang duha ka mga indibidwal.
Suno kay Col. Cesar Lumiwes, hepe sang Aviation Security Unit sang National Capital Region, nagakahulugan nga ang 47-anyos nga driver wala sang impluwensya sang bisan ano nga substance sang natabo ang nasambit nga aksidente.
Gin-athag ni Lumiwes nga gin-drop off sang driver ang iya amo sang temprano sang aga antes natabo ang trahedya.
Ginpunto man sang opisyal nga ang human error mahimo matabo sa bisan kay sin-o, ilabi na kun indi maayo ang kondisyon sang driver bangud sang personal nga problema, stress, ukon pressure.
Dugang pa ni Lumiwes, posible kuntani nga malikawan ang amo nga insidente kun mas malig-on ang bollard nga ginbutang sa entrance sang nasambit nga lugar.
Nagmandu naman ni President Ferdinand Marcos Jr. nga imbistigaran ang kalidad kag ka-epektibo sang bollards matapos ang insidente.
Samtang, nagapadayon ang kaso batuk sa driver sang SUV nga may professional driver’s license kag nahibaluan man nga may yara siya sang record nga nakaubra bilang isa ka overseas driver.
Sa subong, ginpasakaan sang duha ka counts ang driver sang reckless imprudence resulting in homicide, multiple physical injuries, kag damage to property.
