Napilian sang Malacañang ang award-winning tenor nga si Sofronio Vasquez agud magkanta sang Lupang Hinirang sa ika-apat nga State of the Nation Address (SONA) ni President Ferdinand Marcos Jr. sa palaabuton nga Hulyo 28.
Matandaan nga si Vasquez ang labing una nga Filipino kag pinakauna nga lalaki nga nagikan sa Asya nga nagdaog sa The Voice US Season 26, isa sa pinaka-popular nga singing competitions sa kalibutan.
Suno sa pahayag sang Malacañang, ang pagpili kay Vasquez base sa handum sang administrasyon nga itingob ang tradisyon kag talento sang mga Filipino, kag ipabutyag sa publiko ang kadalag-an sang mga Pinoy sa international nga entablado.
Ang pambansang awit ang ginakanta bilang opisyal nga pagsugod sang SONA antes mag-umpisa ang speech sang Presidente.
Ginapaabot nga mangin highlight sang SONA ang pag-perform ni Vasquez, nga ginalauman magahatag sang inspirasyon sa mga tumalan-aw kag tagpalamati.
