ILOILO – Ginsaysay sang tiyo sang biktima sang strafing incident sa Sitio-Catmon Barangay Calansanan I, Badiangan, Iloilo ang mga hitabo antes ang krimen nga amo ang ginalantaw posible nga rason nga nagtulod sa suspek nga magpaarak sang luthang kag makapatay sang 11 anyos nga bata nga babaye.
Una na ginpahayag nga antes ang insidente, may away nga nagluntad sa tunga sang suspek nga si April John Valle, 33, kag kay Richard Yocogco, tiyo sang biktima nga si Mary Jane Yocogco Jano Alyas Poypoy.
Sa interview sang Bombo Radyo kay Yocogco, iya ginpahayag nga nag-umpisa sa party balloon ang ila nga away.
Suno kay Yocogco, nagasakay siya kag ang iya grupo sa pick-up bangud naghalin sila sa trabaho sa kampo kag papauli na kuntani sa ila nga balay.
May nakit-an sila nga duha ka pungpong sang party balloon sa dalan nga amo man ang nakit-an sang suspek nga si Valle.
Gintunga sang grupo nanday Yocogco kag ni Valle ang duha ka pungpong sang balloon kag naghaum nga wala naman sang problema.
Pag-abot malapit sa bangga sa ospital, ginpahayag nga ginbalabagan pa gid sang motorsiklo nga ginamaneho ni Valle ang pick-up nga ginasakyan ni Yocogco.
Ginpahayag ni Yocogco nga gintindakan ni Valle ang pwertahan sang salakyan gani nga nag-gwa man si Yocogco kag gintapungol si Valle.
Nagbulig man sang tapungol ang apat ka tawo nga nag-apin kay Valle gani nga naggwa man sa pick-up ang mga utod ni Yocogco kag ginbalusan kastigo ang grupo ni Valle.
Sang ulihi, nagpadulong sila sa pulis kag nag-aregluhanay.
Sang gab-i sang natabo na ang strafing incident, wala man si Yocogco sa balay nga gintiniran sang iya hinablos nga amo ang biktima.
Ginpahayag sang natungdan nga nakalumbos na siya gani nga wala man siya nakakita kun si April John Valle gid man ang responsable sa krimen.
CHECK RELATED STORIES HERE:
