Away sang duha ka electric power company sa Iloilo City, mas nagasingki

Nanindugan ang MORE Electric and Power Corporation nga nagakadapat i-grant ang application sini para sa Certificate of Public Convenience and Necessity (CPCN) agud maka-operate ini bilang electric power provider sa syudad sang Iloilo.

Sa ikaduha nga hearing nga ginpatigayon sa Energy Regulatory Commission (ERC) para sa CPCN application sang MORE, ginkontra sini ang argumento sang Panay Electric Company (PECO) nga indi ini dapat mahatagan sang CPCN bangud wala pa ini sang asset bilang bag-o nga power distributor.

Sa interview sang Bombo Radyo kay Mr. Jonathan Cabrera, tagpamaba sang MORE,iya ginpahayag nga indi dapat mangin basehan ang asset sa ila application para sa CPCN.

Suno kay Cabrera, wala ini nasaad sa requirements ukon qualifications bangud ang basehan lang amo nga kun may ikasarang ini sa teknikal nga aspeto kag pinansiyal nga aspeto kag na- comply ini sang MORE.

Nahibaluan nga sa nasambit nga hearing, nangin tiglawas sang MORE sanday Engr. Edwin Montemayor kag Neil Parcon nga nagpresentar sang mga ebidensiya sa ikasarang sang MORE sa aspeto teknikal kag pinansiyal.

Natalana naman nga ikatatlo nga hearing sa Abril 24 sa diin maga-presentar naman sang panindugan sang PECO tuhoy sa isyu sanday PECO Administrative Manager Marcelo U. Cacho kag PECO vice president for operations Engr. Randy Pastolero .