Bukas si President Ferdinand Marcos, Jr. nga mag-ayo liwat ang relasyon sini sa pamilya ni Vice President Sara Duterte nga runningmate niya anay sang 2022 elections.
Kabahin ini sang na-istoryahan sa una nga episode sang podcast sang president nga ginpaguwa kasunod sang resulta sang midterm elections kun sa diin anum lang halin sa Alyansa senatorial candidates ang nagdaog.
Pahayag sang presidente, indi man niya gusto ang away, bangud ang gusto niya amo nga maghangpanay lang ang tanan nga mga tawo.
“Oo. Ayoko ng gulo. Gusto ko makasundo sa lahat ng tao. Mas maganda. Marami na akong kaaway. Hindi ko kailangan ng kaaway, kailangan ko kaibigan,” pahayag sini samtang nagakadlaw.
Ginpahangop man sini nga ang ginalagas niya amo ang kalinong para nga mahimo lang ang trabaho.
“Ewan ko. Hangga’t maaari, ang habol ko yung stability, peaceful, para magawa namin ang trabaho namin. Lagi akong bukas sa ganiyan. I’m always open to any approach,” dugang niya. “Halika, magtulungan tayo. Kahit na hindi tayo magkasundo sa polisiya, hindi tayo magkasundo, tanggalin natin ang gulo.”
Madumduman nga temprano nga bahin sang 2024 sang nag-umpisa nga nagtunog ang away sang mga Duterte kag Marcos kun sa diin mismo si former President Rodrigo Duterte kag iya anak nga si Davao Mayor Sebastian Duterte ang nag-akusar kay Marcos nga bangag, adik, kag maluya nga klase sang lider.
Nadugangan ini sa paghalin ni VP Sara sa Gabinete, pagbukad sang mga iregularidad sa opisina sang vice president, pag-imbestigar sang quad comm sa war on drugs, pag-impeach kay Sara, kag pagdakop kay former President Duterte kag pagdala sa iya sa The Hague kag madamo nga iban pa nga nagpasaka sang tensyon sa tunga sang duha ka pamilya.#
