Ginplastar ni presidential sister Senator Imee Marcos nga nagapabilin nga intact ang ila pag-abyanay ni Vice President Sara Duterte apisar pa sang mga statement sang bise-presidente batok kay President Ferdinand Marcos Jr.
Suno kay Imee, gina-ako niya nga maisog siya nga tawo apang indi niya batasan nga magpakig-away sa kay bisan sin-o.
“Ang importante sa akin nakakatawid ako kahit anong alyansa, lahat nakakausap ko. Ayokong nakikipag-away. Sinasabi matapang ako, mataray pa. Oo, totoo ‘yan, aminin ko,” pahayag sini sa sidelines sang isa ka event sa Bulacan subong nga adlaw.
Indi naman magkomento si Imee sa mga atake ni Sara bangud gusto na sini mag-move on na lamang diri.
“Wala, matagal na ‘yun, panis na eh kaya okay na. Tuloy na tayo magtrabaho. Kaya nga sinasabi ko ayokong may alyansa alyansa, papanig sa isa laban dun sa isa, makikipag-bunuan, ayokong makipag-away ang dami dami pang trabaho,” suno sa senadora.
Nahibaluan nga wala na pugong-pugong ang mga statement ni Sara sa Marcos, Jr. administration sa tunga sang imbestigasyon sang Kamara sa paggamit sang confidential funds sang Office of the Vice President kag Department of Education kun sa diin siya man anay ang tiglikom.
Sang nagligad lamang nga Oktubre, nagpanugid man si Sara nga ginpaandaman sini anay si Imee nga kun magpadayon pa ang political attacks batok sa iya, ipakalkal niya ang bangkay ni anay Presidente Ferdinand Marcos, Sr. sa Libingan ng mga Bayani kag itagbong sa West Philippine Sea.
Wala naman sang komento diri si President Marcos Jr.
Sa pihak nga bahin, si Senator Imee ang kabahin sang Alyansa Para sa Bagong Pilipinas nga gina-endorso ni President Marcos Jr. apang nag-atras ang senadora kag nagdesisyon nga magpadalagan bilang independent sa 2025 elections.
