Ginasigurado sang Philippine Charity Sweepstakes Office nga padayon ang ila charity work ukon pagbulig sa mga pigado nga nagapalapit sa ila nga talatapan.
Ini matapos sa nangin mandu ni Presidente Rodrigo Duterte nga untaton ang operasyon sang mga gaming activities sang Philippine Charity Sweepstakes Office bangud sa korapsyon.
Suno kay Philippine Charity Sweepstakes Office general manager Royina Garma, padayon sa gihapon ang charity works bangud ang ginapa-untat lamang sang Presidente amo ang mga gaming activities lakip na ang mga transaksyon nga kaangot sa mga nasambit nga aktibidad.
Dugang pa sang natungdan, may pondo nga natalana ang Philippine Charity Sweepstakes Office sa mga assistance program kaangay sa paghatag sang bulig medikal.
Bangud sa mandu ni Duterte, apektado ang mga palangabuhian sang mga agent kag operator sang mga lotto outlet.
Samtang naghingyo naman ang mga lotto agent kag outlet operator nga pahanugutan sila gihapon nga maka-operate samtang naga padayon ang imbestigasyon.
Gin-athag man sang mga natungdan nga suportado nila ang kampanya sang gobyerno batuk sa korapsyon.
Depensa pa sang mga lotto agent kag operator nga wala sila na-angot sa ano man nga korapsyon sa Philippine Charity Sweepstakes Office.
Nagalaum sila nga mahatagan man sila sang tyansa sang Presidente nga makapaathag.
