Nagdeklarar ang Azerbaijan sang national day of mourning agud ipakita ang kasubo kag simpatiya kasunod sang kamatayon sang 38 ka mga tawo sa pagtibusok sang eroplano malapit sa syudad sang Aktau sa Kazakhstan.
Suno sa Azerbaijan Airlines, ang Embraer 190 passenger plane ang halin sa Baku, Azerbaijan padulong sa Grozny nga kapital naman sang Chechnya region sa southern Russia.
Sakay sini ang 67 ka tawo kalakip ang 62 ka pasahero kag lima ka crew members, kag sa inisyal nga reports, 29 sa ila ang ginadapatan subong sang nagakaigu nga pagbulong sa ospital.
Base sa aviation watchdog sang Russia, nagpatigayon sang emergency landing ang eroplano matapos ang na-eksperyensiyahan nga bird strike. Bangud sa madamol nga ambon sa Grozny airport, ang eroplano ang una nga na-redirect sa Makhachkala kag pagkatapos, nagdirekta ini sa Aktau. Sa tion sang emergency landing, wala nakabaton sang clearance ang crew agud maghugpa sa Grozny.
Ang mga pasahero ang naghalin sa nagkalain-lain nga pungsod: 37 gikan sa Azerbaijan, 16 halin sa Russia, 6 halin sa Kazakhstan, kag 3 halin sa Kyrgyzstan.
Nagpalab-ot sang pagpakig-unong ang airline company sa mga pamilya sang mga biktima kag ginsiguro ang paghatag sang bulig.
Padayon ang imbestigasyon sa matuod nga kabangdanan sang aksidente.
