ILOILO CITY- Kun makakita ikaw sang meteorite ukon bulalakaw ukon sa kinaandan ginatawag naton nga falling star, sa masami kita ang nagahimo sang wish samtang nagatangla sa kahawaan.
Apang, may yara sang isa ka babaye sa British Columbia nga pinasahi ang iya eksperyensiya sa bulalakaw bangud nga sa baylo nga tanglaon, nahulid pa niya ini.
Suno kay Ruth Hamilton, mahamuok ang iya tulog isa ka gab-i sang nakabati siya sang lagabong sa iya atop.
Wala niya ini ginsapak tubtob nga pagbugtaw niya sa aga, nakibot na lamang siya nga may yara sang bato nga daw sandiya ka dako sa iya tupad sang iya ulunan kag natingala siya kun paano ini natabo.
Sang gin-imbestigaran sang mga eksperto sa Western University in London, Ontario, nakumpirmar nga ang amo nga bato ang isa gali ka meteorite.
Suno kay Peter Brown, professor sa physics and astronomy department sang unibersidad, mahimo nga naghalin sa main asteroid belt sang solar system ang bulalakaw.
Dako naman ang pagpasalamat ni Hamilton nga wala nagtupa sa iya lawas ang nasambit nga meteorite bangud pat-ud nga nabutang sa alang-alang ang iya kabuhi.
