Kun indi mo halos ma-imagine ang moment nga makit-an mo sa personal ang dekalibre nga Hollywood megastar nga si Brad Pitt, ano pa gid ayhan kun maka-relasyon mo ang aktor? Siguro feeling mo, daw si Angelina Jolie man ikaw ka-guwapa!
Apang may yara sang isa ka babaye nga naka-relasyon ini nga actor — ukon at least, sa iya nga pagpati, nagpalanggaanay sila nga duha sa sulod sang malawig nga tion.
Eksperyensya ini ni ‘Anne’, isa ka 53-anyos nga French interior decorator.
Isa ka bes, samtang yara sa Instagram, nag-post ang babaye sang iya nga mga laragway matapos nag-ski.
Gilayon nga may nag-chat sa iya nga isa man ka babaye nga nagpakilala nga siya si Jane Pitt nga amo ang iloy ni Brad Pitt. Samtang nagalawig ang ila istoryahanay, gina-sige insister ni Jane Pitt nga bagay gid si Anne sa iya nga anak.
Wala magdugay, may lalaki na nga nag-chat kay Anne sa Instagram kag amo na ang nagpakilala nga siya si Brad Pitt, adlaw-adlaw sila nga nagbayluhanay sang mensahe, tubtub nga… to make the long story short, na-in love si Anne kay Brad Pitt bangud ka-thoughtful kuno sa iya kag interesado gid ini sa iya kabuhi.
Suno kay Anne, wala gid nagakalipat si Brad Pitt nga pamangkuton siya sa iya passion, iya trabaho, kag iya pamilya. Ginapadal-an man siya sang poems, mga kanta, kag mga selfies nga indi man makita ni Anne sa iban nga social media pages.
Masobra isa ka tuig man nga ginpinsar ni Anne nga ka-long distance relationship sini ang actor.
Sa amo sina kalawig nga relasyon, nakapanugid man si Anne kaangot sa iya divorce sa iya anay manggaranon nga bana. May ginbilin ini sa iya nga daku nga kantidad sang kuwarta kag amo ini ang iya ginagamit magluwas pa sa iya trabaho bilang interior decorator.
Sang ulihi, nagpanugid man si Brad Pitt nga may gina-suprer siya nga seryoso nga balatian sa kidney kag naka-admit siya sa ospital, apang indi sini masarangan bayad ang bill bangud sa iya nga pagproseso sang divorce kay Angelina Jolie.
Bangud in love man sila sa isa kag isa, wala gid nagduha-duha si Anne kag nagpadala ini sang kuwarta. Naglab-ot ini sa $850,000 ukon masobra P49.70-million lakip na dira ang iya nabaton halin sa divorce settlement.
Nareyalisar lamang ni Anne nga biktima gali siya sang scam sang nakit-an sini sa balita nga karelasyon gali ni Brad Pitt ang Swiss jewelry professional nga si Ines de Ramon.
Daw kagton sini ang iya siko sa paghinulsol, apang tuman na gid ka ulihi ang tanan, nadulaan na siya sang lovelife, namigado pa siya bangud sa amo nga scam.
Ulihi man sini nareyalisar nga produkto sang AI ukon Artificial Intelligence ang tanan nga pictures nga ginsend sa iya rason nga indi sini makit-an sa iban nga social media page.
Naka-file na si Anne sang reklamo sa pulis kaangot sa scam apang indi klaro kun ano na ang progress ukon may paglaum pa nga masolbar ang iya nga kaso.
