Isa ka indi ordinaryo nga medical case ang nagkibot sa mga doktor sa Western France matapos mag-angkon sang lain nga accent ang isa ka babaye nga residente sa lugar bisan pa nga indi man ini makahibalo maghambal sa Ingles!
Ini amo si Laetitia, 47, cashier sa Montval-sur-Loir.
Siya ang gulpi lang nakahambal nga kaangay sang isa ka Briton humalin sang gin-operahan ini sang 2010 agud kakson ang iya nga tonsils.
Apisar wala man siya sang madalom nga ihibalo sa lenggwahe nga Ingles, kaangay nga natural sa iya nga dila ang British accent kag siya mismo ang nakibot.
Matapos ang serye sang pag-check sa iya, na-diagnose si Laetitia nga may Foreign Accent Syndrome, isa ka rare condition nga mahimo nga idulot sang aksidente, stroke, ukon operasyon.
Sa pihak sang panibag-o nga estilo sang iya paghambal, natun-an na ni Laetitia nga batunon ini.
