Ang pagka-trap sa salakyan ang isa sa mga hitabo nga wala sang bisan isa sa aton ang gusto ma-eskperyensyahan. Delikado ini ilabi na sa mga bata gani nga extra halong gid kita kag bantayan sila sang maayo.
Apang didto sa Newton County sa Indiana, USA, isa ka milagro ang natabo sa isa ka 41-anyos nga babaye sang tion nga siya ang na-trap sa sulod sang iya kaugalingon nga salakyan.
Suno sa Newton County Sheriff’s Office, ini nga babaye nga ginkilala kay Brieonna Cassell, 41, ang naga-drive halin sa Newton County Landfill sang Marso 6 antes siya gin-report nga missing sa mga otoridad. Nagguwa gali nga natulugan si Cassell samtang naga-maneho kag nagbunggo ang iya car kag nahulog sa pil-as nga indi kit-anon sa mga tawo nga yara sa highway.
Puerte nga kasakit ang nabatyagan ni Cassell sa iya lawas, nagsinggit siya agud mangayo sang bulig sa mga salakyan nga mabatian niya nga nagaagi apang indi man niya makita.
Naglawig sang anum ka adlaw nga amo sini ang sitwasyon ni Cassel sa sulod sang salakyan bangud indi siya makaguwa kag halos madulaan na sang paglaum.
Apang sang tion nga nakit-an na gid man siya, conscious ini kag nagahambal pa.
Pahayag sang pamilya, nakaluwas si Cassell paagi sa iya jacket nga iya ginatusmaw sa tubig nga yara sa creek kun sa diin nahulog ang iya salakyan.
Kun matusmaw na niya ini kag ma-absorb na sini ang tubig, gina-amat-amat niya ini butong kag gina-supsop ang tubig para mabuhinan ang iya kauhaw.
Sang nakit-an siya kag gindala sa ospital, nakit-an ang injuries sa iya nga paa, sa iya nga tyan, sa iya nga butkon kag iban nga parte sang lawas.
Gin-airlift man ini agud nga madala sa Chigaco hospital para sa treatment.
Ginapahayag nga stable na subong ang kondisyon sini.
“She would take her hoodie … and suck on it to have water,” suno sa iya iloy nga si Kim Brown. “She persevered. She wanted to stay alive.”
Excited na ang iya pamilya nga maka-pauli ini, ilabi na bangud may tatlo ini ka kabataan nga nagahulat sa iya, nga amo man posible ang nangin inspirasyon sini nga magtinguha nga mabuhi samtang yara sa mabudlay nga sitwasyon.#
with reports from NBC News
