Ang pag-inom sang makahulubog nga ilimnon ang dapat ginabutang sa tyan kag indi sa utok.
Kun nahubog ang isa ka tawo, may yara sang nagahibi, nagaguwa ang talent, naga-english kag ang iban naga chat ukon naga text sa ila mga ex.
Di bala agree ka dira?
Apang didto sa United Kingdom, isa ka babaye ang gintawgan sang local fire brigade agud nga irescue bangud sa tuman nga kahulubgon sa diin na ipit ang iya tiil sa sulod sang ‘clothes dryer’.
Kun nagapanumdom ka kun ngaa nakasulod dira ang babaye nga kuntani para lang ina sa mga panapton, syempre indi madula ang mga hampang, dare kag challenge kun upod mo ang imo barkada sa pag inom-inom.
Wine kag tequila ang gina inom nanday Rosie Cole, 21 anyos kaupod ang iya nga barkada sang gin-challenge ini nga pa-iguon ang iya lawas sa dryer.
Bangud nga naka-inom, ginbaton ni Rosie ang challenge sa iya.
Natuman ni Rosie ang challenge sa iya sang mga barkada apang sang magguwa na ini sa dryer, indi na niya masarangan bangud naipit na ang iya nga tiil kag paa sa sulod.
Wala na sang choice ang mga barkada sini kundi tawgan ang local fire brigade kag natigayon man si Rosie nga makuha gikan sa dryer.
Sa baylo nga maakig, nagkinadlaw na lang sanday Rosie kag iya mga barkada sa natabo.
Ginakabig man niya ini nga pinakamakahuluya kag indi gid niya malipatan nga natabo sa iya nga kabuhi.
