Ginpatay ang babaye nga alkalde sa isa ka banwa sa Mexico pila ka oras lamang matapos ang selebrasyon bangud sa pag-eleher sa labing-una nga babaye nga presidente sa maragtas sang pungsod.
Ang biktima amo si Cotija Mayor Yolanda Sánchez nga gintiro mismo sa amo nga banwa nga iya ginapamunuan halin sang Septyembre 2021. Siya man ang labing-una nga babaye nga gin-eleher sa amo nga pwesto.
Ginpahayag nga 19 ka beses ini nga gintiro kag napatay sa ospital kaupod sa iya bodyguard kasunod sa pagpang-atake. Wala pa sang naaresto nga suspek apang ginapatihan nga ang gunmen ang kabahin sang organized crime group.
Ginpahayag nga nakabaton na ini sang death threats halin sang nagpungko bilang mayor sang 2021 kag nahimo man nga hostage sang armado nga kalalakinhan sang 2023 sa sulod sang tatlo ka adlaw.
Nahibaluan nga halin sang Septyembre sang nagligad nga tuig, masobra na sa 20 ka mga kandidato ang ginpangpatay sa Mexico suno sa official figures, apang ginpahayag nga halos 40 na ini kun basehan naman ang independent surveys.
Ang presidential race sang nagligad nga adlaw ang ginpangunahan ni Claudia Sheinbaum nga magapanumpa sa Oktubre 1 subong nga tuig.
