Nagahilibion ang isa ka babayi nga naga-apply para sa iya TIN ID agud makakuha sang trabaho matapos ginpahayag nga ginpakitaan sang indi manami nga batasan sang isa ka BIR employee sa Novaliches.
Base sa video, tuman ang pagkadismaya sang babayi bangud nag-ekspektar ini sang manami nga pagtratar bangud government employee ang nag-asikaso sa iya, apang napaslawan ini bangud daw kaangay nga wala sang gana kag suplada ang BIR employee.
Nagpabulig ang babayi bangud makapila ka beses nga may error sa iya online application para sa TIN ID rason nga nagpadulong gid ini sa ila talatapan.
Ginhambalan sini ang BIR employee nga magpahuway anay kay daw wala ini sa modo, butang nga ginkaakig sang BIR employee kag ginsinggitan ini.
Sa karon, terminated na sa trabaho ang nasambit nga BIR employee matapos gin-report sang customer kag gindagdagan man ini sang ahensya sang show cause order.
