Nag-agom sang 10 ka pilas ang isa ka babaye matapos nga ginbuno samtang nagakatulog sang wala pa makilal-an nga indibidwal sa Brgy. 5, Poblacion, Igbaras, Iloilo.
Ang biktima amo si Geraldine Embiado, 21-anyos, residente sang nasambit nga lugar.
Sa interview sang Bombo Radyo kay Police Master Sergeant Glen Gellangarin, imbestigador sang Igbaras Municipal Police Station, iya ginpahayag nga antes natabo ang insidente, nag-inom- inom pa ang biktima upod ang iya abyan bag-o nagpauli kag nagtulog.
Suno kay Gellangarin, maswerte man nga nakaluwas sa katalagman ang biktima kag estable na ang kondisyon subong.
Dugang pa sang natungdan nga ginahulat-hulat nalang nila nga maistorya liwat ang biktima para makuhaan sang dugang nga impormasyon.
Sa subong, nagapadayon pa ang imbestigasyon sa posible motibo sa pagbuno sa biktima.
