Ano ayhan ang masarangan mo nga himuon para lang sapakon ikaw sang imo nga crush?
May yara sang babayi nga naga-edad sang 33-anyos kag residente sang Pinhalzinho, Brazil ang nag-viral matapos gin-ako nga permi siya gakadto sa mga patay sa ila komunidad sa sulod sang duha ka tuig agud lang masapak sang iya crush nga isa ka undertaker.
Ang babayi ang ginkilala kay Daniela Signor, kag ang iya crush amo si Apollo Scariot, 31-anyos.
Suno kay Daniela, nakita niya si Apollo sang ini siya ang nagtambong sa lubong sang isa niya ka paryente sang tuig 2023.
Halin sadto, abaw, gulpyada lang nga nagka-crush ini kay Apollo kag gusto niya ini nga makuha ang atensyon sang lalaki.
Basi galibog ang ulo niyo kun ano ang buot silingon sang undertaker? Amo ina sila ang mga tawo nga nagaasikaso sang mga patay, halin sa pag-embalsamar tubtob sa preparasyon sang haya kag lubong.
Ang ginahimo ni Daniela, nagakadto ini siya sa mga haya sa ila lugar.
Apang, wala sa gihapon nasapak ukon natalupangdan ni Apollo si Daniela bangud nga naka-focus ini sa iya nga trabaho.
Matapos ang masobra duha ka tuig nga pag-admire kag pag-antos ni Daniela, sa wakas, nasapakan gidman siya ni Apollo kag didto na nag-umpisa ang ila pag-estoryahanay.
Nag-abot gidman ang tion nga nangin magkarelasyon sila kag nagtapos sa kasal sang nagligad lang nga bulan.
Ang makahalam-ot lang kay sa adlaw mismo sang ila kasal, ginkakibot sang ila mga bisita sang nag-abot sila sa wedding venue nga sakay sa karo sang patay.
Bangud sang madamo nakibot, gin-explain sang couple sa likod sang ila pagpili sang karo sang patay bilang ila sakayan sa ila nga kasal.
Suno kanday Daniela kag Apollo, ini ang isa ka pamatuod nga ang matuod-tuod nga paghigugma handa maghulat, magsakripisyo, kag magpaubos bisan sa tunga sang mga tumalagsahon nga sitwasyon.
