Patay ang isa ka babaye matapos makabunggo ang ginamaneho nga motorsiklo sa naka-park nga fuel tanker sa Barangay San Jose, San Miguel, Iloilo.
Ang biktima ang ginkilala kay Alyas Danica, 27 anyos, kasado, kag residente sang Brgy. Sulong, Alimodian.
Sa interview sang Bombo Radyo Iloilo kay Police Major Bryan Alejo, hepe sang San Miguel Municipal Police Station, ginpahayag sini nga halin sa duty sa syudad ang biktima kag papuli na kuntani sang kaagahon sa Alimodian apang nakabunggo sa fuel tanker ang ginamaneho nga motorsiklo.
Suno pa kay Alejo, posible nga sa tuman ang kakapoy kag katuyo sang biktima gani nga wala sini natalupangdan ang naka-park nga fuel tanker.
Base man sa imbestigasyon, madasig ang pagpadalagan sang motorsiklo sang biktima kag nadulaan ini sang kontrol sa manibela.
Ginpahayag man ni Alejo nga halin sa Aklan ang fuel tanker kag naghapit lang sa San Miguel agud mangape.
Sa karun, yara sa kustodiya sang San Miguel MPS ang driver sang fuel tanker kag ginahulat pa ang desisyon sang pamilya kun mapasaka kaso ukon indi.#
(By: Bombo Glenette Delit)
