Patay ang isa ka babaye matapos nga nalumos sa busay ukon mas kilala nga “Tubig/Bato Sumpit” sa Barangay Igtuble, Tubungan, Iloilo.
Ang biktima amo Anne Maglocot, 26-anyos, nagatrabaho sa University of the Philippines-Visayas, residente sang Brgy. Buyuan, Tigbuan, Iloilo.
Sa interview sang Bombo Radyo kay Engineer Zoilo Gargaritano, Head sang Local Disaster Risk Reduction and Management Office (LDRRMO), iya ginpahayag nga lima sila ka mga kababainhan ang naghalin sa view deck sa Sitio Baldan, kon sa diin, matapos nga nagpaniyaga, nagdulhog, kag naghapit sa busay.
Suno kay Gargaritano, wala sila sang tuyo nga magpaligo sa busay, sa diin, nagpungko-pungko pa sila nga mag-abyan agud nga mag-sight-seeing lang kontani.
Gintumod man sini nga santo sa pagpaathag sang tour guide, samtang nagapungko ang biktima, nadala sang tubig ang iya tiil bangud man sa mabaskog nga daludo sang tubig sa busay.
Gin-athag man sang natungdan nga nakapanghawid pa ang biktima sa kawayan, apang bangud man sa tuman ka baskog nga current sang tubig, indi ini madala pasaka sang tour guide.
Bangud diri, nagsulod ang lawas sang bitkima sa bato kag naipit, rason man nga naglawig sang duha ka oras ang retrieval operation antes natigayon nga makuha.
Gin-ako man sang talatapan nga indi ini ang una nga kahigayunan nga may nalumos sa amo nga busay.
