Pilason ang isa ka babaye matapos nga ginlabo sang iya mismo nga bayaw sa Barangay Cabagiao, Calinog, Iloilo.
Ang biktima amo si Retchel Castigador Sangap, 42 anyos, kasado, wala sang trabaho samtang, ang suspek amo si Roel Alcarde Sangap, 41 anyos, kasado, wala man sang trabaho kag lunsay residente sang amo nga lugar.
Sa interview sang Bombo Radyo kay Police Major Myles Dieron, Hepe sang Calinog Municipal Police Station, iya ginpahayag nga nagainum-inum ang suspek kaupod ang iya amay kag mga tiyo sa ila nga payag.
Suno kay Dieron, samtang galakat papuli ang suspek nasugata niya ang biktima, kag bangud sa daan nga hiligut-anon ginlabo niya ini gamit ang binangon.
Napilasan ang biktima sa iya nga agtang kag nalab-ot man ang nawala nga bahin sang iya kamot matapos ginsagang ang binangon.
Sa subong, yara na sa ospital ang biktima kag yara na sa estable nga kondisyon.
Samtang, nadakpan ang suspek kag ara na sa paghinakop sang Calinog Municipal Police Station.
Ginahulat na lang sang mga kapulisan ang medical certificate sang biktima agud malantaw kun ano ang nagakaigo nga kaso ang ipasaka batok sa suspek.
