Kun kaadlawan sang imo pinalangga sa kabuhi, ano ang handa mo nga himuon para sa iya? Paghatag sang regalo, sorpresa, ukon pagpatigayon sang espesyal nga party?
Para kay Sharaine Domingo sang Cabatuan, Isabela, handa siya nga magpropose sang kasal sa iya nga kahagugma agud nga mangin mas espesyal ang sorpresa niya para sa kaadlawan sang iya nobyo.
Suno kay Domingo, wala pa man nag-umpisa ang pandemya, plano na niya ini nga himuon rason nga kadungan sang kaadlawan sang iya kahagugma nga si Richard Angeles, wala siya nagduh-duha nga dayunon ang wedding proposal.
Tuman na lamang ang kalipay sang babaye sang nagsabat man nga ‘YES’ ang iya nga nobyo matapos siya nga nagluhod kag nagpropose.
Nagtrending naman ang video nga gin-upload ni Domingo sa diin makit-an ang birthday suprise niya sa nobyo kag may paaman pa nga wedding proposal.
Walo ka tuig na nga magkarelasyon ang couple sa diin plano na sang mga ini nga magpakasal sa palaabuton nga Disyembre.
Mensahe ni Domingo sa iban nga mga babaye kaangay niya, wala sang dapat kahadlukan ukon ikahuya sa pagpakita sang pagpalangga para sa kahagugma.
