ILOILO CITY – Malapad ang sakop sang Republic Act 9995 ukon ang Anti-Photo and Video Voyeurism Act of 2009.
Sa pagpaathag sang Law expert nga si Atty. Joenar Pueblo, ang Republic Act 9995 ukon ang Anti-Photo and Video Voyeurism Act of 2009 amo ang pagpalapta sang photo ukon video tuhoy sa ano man nga sahi sang sexual act sang isa ka persona nga wala sang pahanugot.
Suno kay Atty. Pueblo, indi lamang ang mga babayi ang mahimo mabiktima sang photo ukon video scandal kundi lakip man diri ang mga lalaki kag ang nasambit nga aktu ang madata sa subong ilabi na nga mahapos na lang ang access sa gadgets kag internet.
Ginpahayag ni Atty. Pueblo nga may yara sang pyschological effect sa biktima ang pagpalapta sang photo ukon video scandal apang panumdumon gid dapat nga may yara sang layi nga nagahatag sang silot sa mga responsable.
Mahimo nga pasakaan sang kaso may kaangtanan sa paglapas sa Anti-Photo and Video Voyeurism Act of 2009 ang mga nag-upload kag nag-share sa internet, mahimo man nga maulamid ang mga naghatag sang comment sa nasambit nga post depende sa kahulugan sang komento kag mahimo man nga pasakaan sang kaso ang mga nagbaligya, nag-reproduce ukon nagpabantala sini sa media.
Sa moderno nga pagpangabuhi sa subong, nagpaandam ang natungdan nga bisan sin-o ang mahimo mabiktima sang nasambit nga aktu rason nga dapat likawan ang pagpakuha sang nude photos ukon sexy videos kag kun may yara man, indi pag-ihatag ang kopya sa kay bisan sin-o.
