ILOILO CITY – Naglab-ot sa P4,100 ang nakuha gikan sa isa ka babayi nga nabiktima sang budol-budol sa Jaro, Iloilo City
Sa interview sang Bombo Radyo sa tagreklamo nga nagpakilala lang kay Rose, iya ginpahayag nga natuntuhan siya sang isa ka babayi nga nagpakilala nga nagabaligya sang buko juice kag kasoy.
Suno kay Rose, gintanyagan siya sang nasambit nga babayi nga nagpakilala nga si Jenelyn Lecta sang Brgy. Alaguisoc, Jordan, Guimaras nga ang iya pakaisa nga si Mary Jane Guillagarin ang nagapangita sang trabaho.
Suno kay Rose, iya nga ginhingyo kay Lecta nga luyag niya nga kuhaon si Guillagarin bilang kabulig.
Gilayon nga nagpangayo sang P2,000 si Lecta para sugaton ang iya pakaisa nga yara sa Nueva Valencia, Guimaras.
Pagkasunod nga adlaw, nagpangayo pa gid sang dugang nga P1,500 si Lecta agud nga ibayad sa utang sang iya pakaisa tubtub nga nagpangayo pa gid sang dugang nga P600 para idugang sa ila pamasahe padulong sa syudad sang Iloilo.
Ginpahayag Rose nga siya mismo ang nagpadala sang kwarta kay Guillagarin paagi sa money remittance center.
Sang adlaw nga ginpadala ni Rose ang pinaka-ulihi nga kantidad, nagabayluhanay pa sila nga tatlo sang text message.
Nagab-ihan lang suno sa tagreklamo apang wala gid naka-abot si Guillagarin sa ila balay kag wala na nagareply sa mga text message kag wala man nagasabat sa tawag.
