Patay na sang nasapwan ang isa ka babayi matapos apat ka adlaw nga nadula sa sulod sang Central Ma-ao, Brgy Don Jorge Araneta, Bago City sa Negros Occidental.
Base sa imbestigasyon sang mga kapulisan, ginkilala ang biktima kay Kristine Joy Dignadice, 43-anyos, kun sa diin nahibaluan ang iya kamatayon sa salakyan sini nga ginbilin sa Hinigaran, kag nakita ang mga dugo sa passenger kag driver seats sini.
Ginkumpirmar ni Police Regional Office – Negros Island Region (PRO-NIR) Director, Police Brigadier General Arnold Thomas Ibay nga ang suspek sa pagpatay ang isa ka pulis personnel, nga nag-surrender man sa mga otoridad kaina sang aga.
Ginpahayag ni Ibay nga wala ginlubong ang biktima, sa baylo ginguyod ini pasulod sa kampo agud matago.
Wala pa man derekta nga kumpermasyon si Ibay sang tanan nga detalye bangod padayon pa ang imbestigasyon kag proseso sang Scene of the Crime Operatives (SOCO).
