Nakit-an pa sa closed circuit television (CCTV) camera footage nga nakasakay pa sa isa ka pribado nga salakyan sa Pototan, Iloilo ang babayi nga sang ulihi nasapwan nga patay na, nakasulod sa sako, kag nahal-id sa Barangay Pacil, New Lucena, Iloilo.
Marso 1 sang ginapahayag nag-abot ang biktima nga si Jonalyn Sucaldito sa atubang sang Iloilo Provincial Hospital sa Pototan sakay sa iya nga motorsiklo.
Sandig sa nakit-an sa CCTV footage, ginbilin sini ang iya nga motor kag nagsaylo sa isa ka pribado nga salakyan kag naglakat ang salakyan sa direksyon nga padulong sa Iloilo City.
Sa interview sang Bombo Radyo kay Pol. Lt. Jerson Baldevia, hepe sang New Lucena Municipal Police Station, iya ginpahayag nga indi klaro sa footage ang plate number sang salakyan gani nga ipasa pa ini sa Regional Anti-Cybercrime Unit (RACU) agud nga mas mabusisi.
Ginapahayag 9:40 am sang natabo ang pagsakay ni Sucaldito sa amo nga salakyan, kag wala man nakit-an nga daw ginpilit ukon ginpwersa ini gani posible suno sa pulis nga kilala niya kun sin-o ang yara sa amo nga private car.
Samtang, sa interview naman sang Bombo Radyo kay George Jaranilla, utod ni Jonalyn, iya ginpahayag nga sang amo man nga adlaw, ginapahayag 2:00 sa hapon, nakapadala pa ini sang mensahe sa iya nga anak nga indi pagpabay-an ang iya nga mga manghod.
Apat ang anak ni Jonalyn kag subong ligum-dulom pa ang pamilya kun sin-o ang naghimo sang krimen.
Kun madumduman, sang nasapwan ang bangkay sang biktima, underwear na lang ang suksuk sini, kag may nakasulat sa sako nga ginsudlan sang bangkay nga: ‘Hayop ka Jovan Abantao at Alyas Supat.’
Si Jovan Abantao amo ang ginatudlo nga lider sang Abantao Drug Group sa Iloilo.
May nakuha man ang otoridad nga lima ka sachets sang suspected shabu kaupod sa bangkay ni Sucaldito.
Si Sucaldito ang ginapahayag wala man sang rekord sa New Lucena kag Pototan MPS, kag wala man sang record sa Philippine Drug Enforcement Agency (PDEA) VI nga may involvement ini sa illegal drug operations.
