ILOILO CITY – Nagtalang lang kag indi hungod ang pagsulod sang isa ka babayi sa hulot sang isa ka lodging house sa Molo, Iloilo City sa diin may yara na sang mag-partner nga naga-okupar.
Ini ang kasunod sang pagpa-blotter sang 53 anyos nga Overseas Filipino Worker kaupod ang iya nobyo nga naga-edad sang ginabanta 30 anyos matapos nga hinali lang nga nagsulod ang indi nila kilala nga babayi sa sulod sang hulot nga ila gin-okupar.
Sa interview sang Bombo Radyo kay Police Chief Master Sergeant Romelo Tabuyoc, imbestigador sang Molo Police Station, iya ginpahayag nga nagsala lang sang kwarto nga ginsudlan ang nasambit nga babayi.
Suno kay Tabuyoc, ang nasambit nga babayi ang ginpa-apas lang sang isa nila ka customer kag nagsala lang ang iya pamatin-an sa room number nga ginhambal sang room boy.
Ginpahayag man ni Tabuyoc nga wala na napunggan sang room boy ang nasambit nga babayi sa pagsulod sa kwarto kun sa diin nagatinir ang mag-partner.
Nahibalu-an nga nagpamalibad nga magbayad ang mag-partner bangud sa indi maayo nga serbisyo sa nasambit nga lodging house.
