ILOILO CITY – Isa ka mataas nga opisyal sang Sibat Platoon sang Southern Front Komiteng Rehiyon-Panay ang babayi nga napatay sa nagluntad nga engkwentro sa tunga sang rebelde nga grupo kag sang 61st Infantry Battalion sang Philippine Army sa boundary sang Barangay Cananaman, Leon kag Barangay Ayubo, Tubungan, Iloilo.
Positibo nga gin-identify sang pamilya sini ang napatay nga amo si Rebecca Aliparo, 56, residente sang Barangay Bagacay, Tigbauan, Iloilo kag 38 na ka tuig nga katapo sang rebelde.
Sa interview sang Bombo Radyo kay Police Lieutenant Danilo Noca, hepe sang Leon Municipal Police Station, iya ginpahayag nga si Aliparo ang nagaserbe nga finance officer kag political instructor sang rebelde nga grupo.
Suno kay Noca, aktibista na si Aliparo sang naga-eskwela ini sa kolehiyo kag wala na nakapa-uli sa ila balay.
Sang amo nga tion base sa panaysayon sang pamilya, nahibaluan na nila nga nag-upod na sa hublag ang ila himata.
Tuig 1994 sang napatay ang iya amay gani, nagpauli ini sa ila balay kag ginhaylo sang iya pamilya nga magbalik sa sabak sang gobyerno apang ginpanindugan niya sa gihapon ang iya prinsipyo.
Una na nga ginpahayag sang 3rd Infantry Division nga magluwas sa napatay nga babayi, may isa pa ka lalaki nga napilasan sa encounter.
Nagluntad ang encounter kasunod sang report sang pumuluyo nga may mga armado nga tawo nga yara sa lugar.
