ILOILO CITY – Nakilala na ang babayi nga nasapwan sang damlag lang sa old dumpsite sa Brgy, Alibhon, Jordan Guimaras.
Sa interview sang Bombo Radyo kay PO3 Jose Lacson, imbestigador sang Jordan Municipal Police Station, ang biktima ang ginkilala kay Emilyn Ganancial sang 23-anyos sang Sitio Igbantang, Sta. Teresa, Jordan, Guimaras.
Mismo ang pamilya ang nagkilala sa biktima suno kay Lacson.
Nagpahibalo pa ang biktima sang Agosto 1 nga magapadulong sa syudad sang Iloilo agud nga magreview sa Criminology board examination.
Sang gab-i, nagpadala pa sang text message ang biktima nga magapadulong sa Antique agud nga magtambong sa isa ka birthday party.
Nakibot na lang ang pamilya suno kay PO3 Lacson nga wala na makapauli ang iya bata kag nahibalu-an na lang nga ang babayi nga nasapwan sa old dumpsite amo si Emilyn.
Wala ginadula ang posibilidad nga ginhimuslan ang biktima bag-o ginpatay.
Sa subong suno kay Lacson, may person of interest na kun sin-o ang suspetsado.
