ILOILO CITY – Nagpamilin-bilin pa si Shiela Mae Magluyan antis pa man natabo ang pagpatay sa iya sa Patnongon, Antique.
Suno kay Stephanie Panagdato, manghod sang biktima, ulihi nila nga na-istorya ang biktima sang Lunes sang hapon, sa diin nagpangayo ini sang allowance apang ginhambalan ini nga mahimo sa Huwebes pa makapadala.
Diri kag nagpahayag si Magluyan nga indi na ini matabo bangud nga mapatay na siya kag naghinyo man ini nga kuhaon ang iya nga bangkay sa Antique.
Pahayag pa sang manghod sang biktima, sa ila nga pagkahibalo, wala sang trabaho si Shiela Mae kag ginhagad lang ini sang iya nga abyan nga maglagaw antis ang krimen.
Plano naman sang pamilya nga ipaidalom sa autopsy examination ang biktima, sa diin ginalantaw sang mga ini nga tama ka brutal ang pagpatay sa iya bangud nga wasak gid ang itsura sini.
Nahibaluan nga naghalin na sa Ticud Lapaz ang biktima lima na ka tuig ang nakaligad kag nagsaylo sa bana sini sa Antique.