ILOILO CITY – Gina obserbahan pa sa Ospital ang isa ka 30 anyos nga babayi nga preso sang Iloilo District Jail Female Dormitory nga ginapahayag naghikog.
Nasapwan na gid lamang nga nagabula na ang baba sang babayi nga tumandok sang San Isidro Jaro Iloilo City matapos nag-inom sang astringent ukon panglimpyo sa guya.
Ang babayi nga ginkilala lamang sa alyas nga “Cha” ang may kaso nga 8 counts sang Estafa kag Carnapping.
Nakit-an man sa mga gamit sini ang isa ka suicide note nga nagapangayo sang pasaylo sa iya iloy kag sa iya partner tungod sa iya nahimo nga sala.
Naghatag man ini sang mensahe sa iya bata kag nangayo man sang pasaylo sa iya mga kaupod sa presuhan.
Sa karon padayon pa ang imbestigasyon sang pamunuan sang presohan tuhoy sa insidente samtang yara na sa istable nga kondisyon ang biktima.