ILOILO CITY – Wala na natabangan ang isa ka wala makilala nga babayi matapos nga naghikog gamit ang habol sa sulod sang isa ka lodging house sa Molo, Iloilo City.
Santo sa pahayag sang room boy, nag check-in ang babayi sakay sa taxi kag nag-oder pa sang chopsuey.
Sang gindul-ong na sang room boy ang order nga pagkaon,nakita niya nga nagabitay na sa railing sang hagdan ang babayi gamit ang habol.
Sa interview sang Bombo Radyo kay Police Chief Master Sergeant Lario Esposo, imbestigador sang Molo Police Station, iya ginpahayag nga ang biktima ang ginabanta naga-edad sang 20 tubtub 30 anyos, chubby ang panglawason, may mga tattoo sa lawas, nakasuksuk sang yellow nga shirt kag stripe nga shorts.
Gindeklarar nga dead on arrival sa hospital ang biktima.
Nakuha sa kwarto sang biktima ang bag nga duag blue, cellphone, relo, sigarilyo lipstick kag iban pa nga personal nga gamit.
Samtang, suno naman sa taxi driver nga nagpahinago lang sa pangalan nga Gemini, nagsakay sa Molo Plaza ang babayi kag nagpadul-ong sa Sofia Lodge.
Bag-o pa man sila nakalab-ot sa lodging house, ginpahayag ni Gemini nga masako ang babayi sa iya nga cellphone.
Bangud nga disgustado sa Sofia Lodge, ginpahayag ni Gemini nga nagpadul-ong sa Dragon Lodge ang biktima kag ginpili ang kwarto malapit sa hagdanan.
Ginpahayag ni Gemini nga wala man siya sang may namutikan nga lain sa biktima.
