Arestado ang isa ka social media influencer sa Japan bangud sa paghimo kag pagbaligya sang libro nga nagatudlo kun paano huthutan sang kwarta ang mga “sugar daddies” kag mga “dirty old men”!
Ang babayi amo si Mai Watanabe, 25, kag residente sang Naka-ku, Nagoya, Japan.
Ang libro ang may titulo nga “Textbook for Sugar Babies: The Right Profile” kag “Magical Words to Make Men Pay”.
Ang mga nasambit nga libro ang nagaserbe nga manual para sa mga kababainhan nga gusto makakita sang kwarta pamaagi sa pag-angkon sang “sugar daddy”
Suno sa mga nakabasa na sang libro, detalyado ang mga instructions ang nakabutang.
Ginatudlo diri kun paano magpangita sang sugar daddy, paano sila palapitan kag akiton kag kun paano man ang husto nga pagpang-into sa mga ini.
Sa isa ka interview sa Naka Police Department, ginpahayag nga nag-umpisa ang pagbaligya ni Watanabe sang mga libro sa iya nga mga social media followers sang 2022.
Nagabalor ang mga libro sang 10,000 Yen ukon P3, 700 tubtob sa 20,000 Yen ukon P7, 400.
Naga-offer man si Watanabe sang face to face private lesson sa mga gusto nga makita sang personal kun pan-o pangwartahan ang isa ka sugar daddy.
Antes gin-aresto, nakabaligya na ini sang masobra 2,000 ka mga kopya sang mga libro.
Bangud sa imbestigasyon, natukiban nga beterano na sa pagpanghuthot sang kwarta si Watanabe bangud may mga report nga kapin 150-million-yen na ang nabaton niya nagikan sa nanari-sari nga mga kalalakinhan.
