Malipayon nga gin-anunsyo sang celebrity couple nga sanday Megan Young kag Mikael Daez nga ginapaabot na nila ang first baby sa 2025.
Ginpaagi sang beauty queen-actress kag actor ang maayo nga balita sa Super Mario-inspired video announcement sa Instagram.
Gin-flash ang “Player Number 3” sa screen kag ginpakita man ang ultrasound film kag ang baby bump ni Megan.
Sunod nga ginhalukan ni Mikael si Megan sa ulo kag nagtapos ang video nga may nakabutang nga “Baby Daez 2025.”
“A new beginning for us. Bonez & Fofo & Baby Daez,” caption nila sa Instagram. Kilala sila nga duha nga nagatawganay bilang si “Bonez” kag “Fofo.”
Base sa past interviews sang mag-asawa, ginpakigbahin nga wala gid nila gindalian ang pag-angkon sang anak. May isa man ka podcast sang 2022 nga naka-ako ang beauty queen nga nahadlok siya nga magbusong.
“I think the unknown is scary, ‘di ba? ‘Di pa naman nangyayari sa akin. There will always be that fear pero whatever happens, happens in my life, if it’s there, it’s there. If it’s not, then tatanggapin ko rin,” kabahin sang pahayag ni Megan sang 2022.
Nahibaluan nga na-engage ang duha sang 2014 apang madugay pa antes ginpahibalo sa publiko. Nagpakasal sila sang Enero 2020.
