Nagalibog ang ulo sang mga pulis sa Wellington, New Zealand kun paano patawhayon ang sitwasyon bangud linibo ka mga protesters ang nagtingob agud pamatukan ang vaccine mandate sang gobyerno.
Bangud sini, lain-lain na nga creative efforts ang ginhimo — may direkta nga pagpakitluoy sa mga tawo, may gin-deploy nga sprinklers, kag may yara pa gani nga gin-aresto gid ang mga protesters apang nagadamo pa gid gani ang mga tawo.
Sa ika-lima nga adlaw sang protesta, gintilawan sang mga pulis ang taktika nga “battle of the music speakers”.
Una nga ginpatunog ang 15 minutos nga loop sang mga kanta ni Barry Manilow lakip na ang Mandy, may yara man sang Macarena sang Los Del Rio, kag ginsulit-sulit man sa pag-play ang Covid-19 vaccine advertisements.
Ginpangpili pa sa playlist ang world’s 25 most hated songs agud nga maghawan ang tawo.
Ang resulta? Gin-boo sang mga tawo ang mga kanta kag nagkanta man ang mga protesters sang 1984 Twisted Sister song nga “We’re Not Gonna Take It.”
Sang ulihi, wala pa gid nag-untat ang otoridad, ginplay pa gid ang “My Heart Will Go On” ni Celine Dion pati na ang children’s songs kaangay sang “Let It Go” sang Frozen kag “Baby Shark.”
May bonus pa ini nga “You’re Beautiful” sang English Musician nga si James Blunt.
Nangin viral ang ginhimo sang mga pulis, apang palpak man gihapon bangud wala sang labot ang mga tawo kag nagsaot pa gid gani kag nag-upod sa pagkanta bangud nasaulo na nila ang lyrics.
Sa subong, nagdesisyon ang mga pulis nga sundon na ang hands-off approach matapos ang ila attempt nga kontrolon ang publiko nga amo ang nagresulta sa bayolente nga ilinaway kag pag-aresto sa masobra 100 ka tawo. ##
