Ginbawian sang kabuhi samtang ginabulong sa ospital ang back rider nga nagsuhot sa nagasunod nga truck sa Benigno Aquino Avenue, Mandurriao, Iloilo City.
Ang backrider amo si Reynaldo Sitchon, 48-anyos, residente sang Brgy. Sooc, Arevalo, Iloilo City; samtang, ang driver naman amo si Vincent Rebano, 28-anyos, residente sang Brgy. Katilingban, Molo, Iloilo City.
Sa interview sang Bombo Radyo kay Patrolman Jonell Alimodian, Traffic Investigator sang Iloilo City Police Office-Traffic Investigation and Enforcement Unit (ICPO-TIEU), iya ginpahayag nga nakaagum si Sitchon sang patal nga pilas sa dughan nga amo ang gintunaan sang iya kamatayon.
Suno kay Alimodian, nagpundo ang motorsiklo nga ginasakyan sang mga biktima agud maghatag sang dalan sa naga U-turn nga salakyan, kun sa diin, nagasunod ang truck nga may karga sang isda.
Apang, hinali lang ini nga nagbunggo sa likod nga bahin sang motorsiklo nga rason sang pagsuhot sang back rider sa idalom sang truck.
Suno sa driver sang truck, wala gilayon nagkagat ang brake sang salakyan rason nga wala nakahingagaw sang pundo ang truck.
Nagapangatubang naman ang driver sang truck sang kaso nga reckless imprudence resulting in homicide, physical injury, and damage to property.
