Naistoryahan na naman ang Bar ratings sa sulod sang impeachment trial ni Vice President Sara Duterte.
Kun sang una, si defense lawyer Mark Vinluan ang nagmensyonar sini; subong, siya naman ang nag-object.
Ini matapos ang pamangkot ni prosecution lawyer Mae Divinagracia kay Anti–Money Laundering Council (AMLC) Executive Director Ronel Buenaventura kaangot sa iya nga qualifications nga magpungko bilang executive director lakip na ang iya background bilang abogado.
Si Buenaventura nga testigo kahapon ang nag-Rank 10 sa 2015 Bar Examinations nga may rating nga 85.75%.
“Nakapasa naman po. I placed 10th po,” suno kay Buenaventura sang ginpamangkot sa iya pagkuha sang pasinawan.
Sang ginpamangkot na sang iya rating, diri na kag ginsulit ini sang prosecution lawyer: “85.75? 5.7 percentage points more than yung 80 percentage points na nakuha ng kakilala namin ni Atty. Vinluan.”
Nag-object gilayon si Vinluan kag gin-grant man sang presiding officer ang mosyon sini nga kakason sa record ang amo nga komento.
Gilayon nga nakaagaw sang atensyon ang amo nga pamangkot kag komento ni Divinagracia ilabi na bangud ginhambal niya ini sa atubang ni Vinluan.
Kun madumduman, sang nangin witness sang una sang prosecution si NBI Regional Director Jeremy Lotoc, si Atty. Vinluan amo man anay ang nagplastar sa impeachment court nga 80% ang Bar rating ni Vice President Sara Duterte.
“She (Duterte) has a law degree and passed the Bar Exam on the first attempt with a rating of 80 percent. She has a higher grade than most of the lawyers here,” suno kay Vinluan sang amo nga tion kun sa diin nag-object man si Atty. Amando Virgil Ligutan.#
