Literal nga nag-backfire sa suspek ang ginhimo sini nga pagsunog sa isa ka restaurant sa Melbourne, Australia.
Samtang ginahimo sang lalaki ang pagsunog, pati siya, nasunog man.
Base sa video sang pulis nga gin-post sa social media, nagsulod ang lalaki sa restaurant nga may dala nga fuel container. Ginbubo niya ang unod sini sa may bar area.
Pagkadugay-dugay, nag-ibwal na ang kalayo, apang nadala pati ang iya nga bayo gani nga nagligid-ligid siya sa salog.
Nagdali-dali ini guwa kag nagsakay sa kotse nga nagakalayo pa ang bayo, apang sang ulihi nanaog naman ini kag nagligid para mapatay ang kalayo.
Nakapalagyo gid ini sang ulihi gamit ang kotse nga nagahulat sa guwa sang restaurant.
Suno sa pulis, may minor damages sa restaurant kag padayon nila nga ginapangita ang suspek.
Sigurado man ang awtoridad nga bisan nakapalagyo ang lalaki, nagapaidalom ini subong sa treatment bangud sa mga paso sa iya lawas bangud sa literal nga pag-“backfire” sang iya ginhimo.
