ILOILO CITY – Nawasak ang ten-wheeler truck kag backhoe matapos nga natiphagan sang duta sa quarry site sa Sulangan, Dumangas, Iloilo.
Suno kay SPO1 John Kim Banzon, imbestigador sang Dumangas Municipal Police Station, ila nga ginalantaw nga naghumok ang duta bangud sa asud-asud nga pag-ulan sa lugar rason nga ini ang natiphag ini.
Masobra naman sa isa ka oras ang pag-rescue sang katapo sang Bureau of Fire Protection sa driver sang truck nga si Raegan Biñas, 36, sang Poblacion, San Enrique nga naipit sa sulod kag nautod ang tatlo ka tudlo.
Samtang nakaluwas man ang helper sini nga si Reymar Silvestre, 21, sang Sulangan, Dumangas, kag operator sang backhoe nga si Ronet Biñas, 41, sang Cubay, Jaro matapos nga nakahalin sang nakit-an nga nagahuganas na ang bato kag duta.
Nahibaluan nga ang amu nga truck ang ginapanag-iyahan ni Dennis De Vicente sang Restia Marketing nga nabase sa Napnod, Leganes, Iloilo, samtang ang quarry permitee naman ang nakapangalan kay Mary Ann Pama sang Sulangan, Dumangas.